湖人中鋒拜林原定喺星期六朝早跟隨大隊搭飛機去多倫多，點知佢當日朝早9:15起身將行李攞出房門後再入房瞓過，結果miss咗班機，要自己畀300蚊美金搭飛機去多倫多，結果夜晚8點先同一班隊友會合，據講仲被罰250蚊美金。

雖然拜林尋日繼續獲委正選，可惜分擔唔到高比拜仁嘅工作。其實高比拜仁已經打到上晒身，個人獨取27分、16個籃板同9次助攻嘅「準三雙」成績，不過速龍嘅陶告魯喺完場前1.2秒上籃博到湖人球星加素犯規兩罰皆中反超前1分。完場前高比拜仁射3分波唔入，注定湖人要以1分飲恨。

放大圖片	放大圖片	放大圖片

讓得起巫師11分

輸得咁唔抵，湖人聽日作客巫師肯定博翻身，撞啱巫師自亞連拿斯無限期停賽後愈打愈沉，尋日主場更以78:92大敗喺快艇手下錄得3連敗，湖人讓11分咁狠，睇嚟開出上盤機會唔細。