本文重點
憑臨完場前一輪「3分雨」攻勢奏效，紐約人尋日喺NBA獨腳戲，主場以97:93勝山貓，當中單係加連拿利全場射入5個3分，聽日作客火箭面對近期射3分波亦好掂嘅布魯克斯，大盤可期。
明鬥火箭鬥遠射
紐約人同山貓尋日喺比賽中一直咬得好緊，勝負關鍵取決於紐約人踏入第4節後3分波8射6中，意大利前鋒加連拿利更喺完場前1分31秒內，接連射入2個超遠程3分波，打窒咗山貓道氣。全場射入5個3分、獨取17分嘅加連拿利，賽後講笑咁話平時練波都冇限自己喺邊個位射！
最終紐約人以4分之差擊敗山貓取得3連勝，兼攞到近16場比賽第11場勝利。聽日紐約人作客火箭，加連拿利3分波勁係人都知，但火箭嘅布魯克斯，踏入1月短短1個禮拜，亦已經入咗10個3分，睇怕一場巨型嘅「3分雨」聽日將會喺火箭主場落下，有咩比買大盤仲穩陣？
文：勒邦芝士