本文重點
火箭日前表明將會賣走「T-Mac」，呢個消息似乎反而激起其他球員嘅鬥心，當中布魯克斯更加大發神威，射入5個3分波，帶領火箭主場以108:100反勝黃蜂，喺元旦日德州打吡硬撼小牛之前壯壯聲威。
其實黃蜂尋日表現唔曳，大前鋒大衞韋斯攻入職業新高44分，「CP3」基斯保羅更取得今季首個「大三元」，取得16分、11個籃板同10次助攻，一度帶領黃蜂喺第3節領先火箭8分。不過火箭嘅布魯克斯亦唔弱，個人攻入27分，當中仲射入5個3分波，追平自己喺NBA生涯嘅紀錄，率領火箭喺第4節大反擊成功射死黃蜂。
德州打吡讓得起小牛
其實火箭今季已經有姚明因傷提早收咧，依家仲有麥基迪因為不滿上陣時間即將被換走，可以話雪上加霜。不過尋日射入18分嘅「神鳥」蘭特利就話未驚過：「每個人喺更衣室都好堅強，個個都想贏。季初好多人都睇死我哋今季冇運行，不過依家咪打得幾好，我哋嚟緊會繼續畀心機，以樂觀嘅態度面對挑戰。」
聽日元旦日，火箭將會進行德州打吡，喺主場接受小牛嘅挑戰。依火箭目前嘅狀態同士氣，應該有力再下一城，讓5.5分上盤絕對玩得過！
