本文重點
籃網今季真係衰到貼地，尋日主場輸畀雷霆89:105後錄得10連敗，不過喺呢個低潮期，易建聯反而搵到機會上位，昨仗更取得平職業新高得分添！
轟29分平職業新高
易建聯復出後愈打愈好，繼前兩仗分別取得22同17分後，對雷霆更可謂打出加盟NBA後代表作，喺內線頻頻爆籃入樽，最後取得平職業新高嘅29分，兼有7個籃板同2次偷波，追平737日前處子球季創造嘅紀錄，當中喺上半場射入18分，更刷新個人NBA生涯半場得分新高。只可惜最後仍然目睹球隊敗陣收場，雷霆贏波就全靠杜蘭特，事關佢射入平今季個人得分最高嘅40分。
雷霆教練史葛布魯克斯賽後大讚易建聯：「我希望易建聯嚟緊可以健健康康，佢真係一個好可怕嘅球員，喺球場上有好多貢獻。」不過易建聯就唔係好開心：「我睇咗統計數據，知道自己平咗得分紀錄，但球隊輸咗，自己攞幾多分都已經冇意義。」其實易建聯都唔使咁灰心嘅，事關籃網聽日會繼續喺主場對紐約人，以佢嘅勇態，相信可以帶領球隊輕取兩連敗嘅紐約人，小讓2分上盤玩得過！
