高比紮住上難敵太陽

據湖人官網透露，阿堤斯聖誕節當日喺屋企行樓梯，唔小心差錯腳碌咗落地，事後被送入院檢查，後腦同左手手肘都縫咗幾針，同時出現腦震盪情況，未知幾時可以復出。

因為阿堤斯突然受傷，湖人尋日作客帝王打到亂晒龍，主將高比拜仁更喺第3節整傷右手手臂，一度要返入更衣室治理，到第4節先復出，兼要轉用左手射波，結果被帝王追成94平手。到第1次加時又一度落後7分，最後要喺第2次加時憑全場射入38分嘅高比仔，射入兩個致命3分波先取得最後勝利。

其實湖人喺今個聖誕真係忙到甩轆，5日內要打4場比賽，之前主場輸畀騎士，尋日作客又要經過兩次加時先贏到帝王，聽日作客火力強勁嘅太陽，喺阿堤斯好大機會缺陣，兼高比仔帶傷上陣下，隨時大敗一場都唔奇。