本文重點
昔日NBA黃金拍檔高比拜仁同奧尼爾，尋日不約而同喺比賽入面受傷，當中高比拜仁雖然食指骨裂，依然頂硬上，仲帶領湖人贏木狼104:92添；至於奧尼爾則畀人打傷左眼入院，好彩Check完證實冇事，應該可以趕得切喺聽日對雷霆上陣。
巨無霸勇戰撞傷眼
湖人球星高比拜仁係喺尋日第一節尾段被木狼嘅哥利比華從後「打荷包」時被整傷手，之後喺第二節斷斷續續上陣，到完半場照完X光後，先發現食指骨裂，不過高比戴上夾板固定食指後又披甲，轉用左手射波同交波一樣得心應手，最終個人射入全隊最高嘅20分，帶領湖人擊敗木狼取得11連勝。
另邊廂，「巨無霸」奧尼爾亦喺第三節準備上籃時，被拓荒者中鋒比沙比拉打傷左眼退下火線，好彩騎士最後憑勒邦占士射入33分，加上喺完場前以「飛將軍姿態」封走萊爾嘅射波，主場贏拓荒者104:99。講番奧尼爾，佢賽後被送入院檢查證實冇事，預計聽日可以隨隊作客雷霆，不過騎士少讓2.5分實在太筍，芝士會冷吼下盤！
