本文重點
尋日上演嘅NBA賽事，可以話畀2個侯活搶晒鏡。「野獸」杜域侯活大發神威，率領魔術贏波賀自己24歲生日；至於養傷多時嘅祖殊侯活，一復出亦有sharp醒演出，成為小牛射落鳳凰城太陽嘅功臣。
祖殊侯活復出有貨交
尋日24歲生日嘅杜域侯活，作客洛杉磯簡直好似荷里活影星舉行盛大party一樣，賽前獲得隊友、對手、球迷甚至球證祝福，結果「野獸」亦不負所託，個人獨取25分、11個籃板、5次助攻、2次偷波同7次封波，帶領魔術作客以97:86變走快艇。賽後「野獸」為咗答謝fans支持，仲將波衫同波鞋送畀佢哋，並講笑咁話：「洛杉磯係一個比賽嘅好地方，除咗對湖人。」
同樣叫侯活，小牛嘅祖殊侯活尋日亦有精彩表現。呢位小前鋒今季因傷之前只打過3場比賽，尋日係佢缺陣13場後首次復出，但後備上陣卻愈打愈有，獨得20分同6個籃板，成為小牛主場險勝太陽102:101嘅功臣。賽後太陽主將史杜迪米亞話：「我好驚訝侯活復出後首場比賽就打得咁好，佢完全喺度表現緊自己，好似冇傷過咁。」全場射入33分嘅魯域斯基亦大讚侯活嘅表現：「只要侯活搵番比賽節奏，小牛將成為一支好難擊敗嘅球隊。」
最後值得一提，尋日作客擊敗快艇後，魔術成功創出球會史上單季最佳作客8連勝紀錄，聽日作客只要擊敗爵士，就可以追平球會史上最長作客連勝紀錄，難得小讓1分，上盤真係幾抵玩。