湖人開咪宣布贈興

外間一早傳言無論對湖人咩戰果，籃網都會炒咗教練法蘭，點知一班高層喺對湖人前夕就炒咗佢，令法蘭成為黃蜂嘅史葛後，今季第2位被炒嘅NBA教練。籃網諗住暫時起用助教巴利斯會有轉機，可惜喺布克盧比斯射入26分下，仍然扭轉唔到頹勢，上半場已經落後畀湖人27分，最終以19分大敗，錄得17連敗，追平熱火喺88年，以及快艇喺99年所創嘅NBA史上最差開季紀錄。

賽後湖人喺籃網球員仲未返入更衣室下，竟然開咪公開宣布佢哋已經創出「新紀錄」。籃網如果唔想獨攬NBA開季成績最差呢個朵，嚟緊主場一定要擊敗小牛，不過對手今季狀態大勇，睇嚟籃網想開齋，最快要等嚟緊10號主場對勇士，但如果連呢場都贏唔到，籃網喺12月中會進入地獄賽程（見附表），有可能會一直輸落去，直至23號主場贏到西岸同屬魚腩嘅木狼，輸夠28場先開到齋！