29/11/2009

播放本新聞相關短片

安東尼弗爆捧金塊上盤

被視為有力挑戰MVP寶座嘅金塊球星安東尼,尋日朝取得個人生涯新高50分,帶領金塊喺主場以128:125險勝紐約人。金塊聽朝喺主場迎戰魚腩木狼,就算要讓10.5分,都照捧上盤啦!

豪取50分險勝紐約人

金塊連埋今場勝仗,原來已經係跨季17連勝。佢哋今仗贏波,頭號功臣係交出50分、6籃板同5助攻嘅安東尼,事實上,安東尼今季仲係NBA唯一一個每戰均取得20分以上嘅球星,有佢孭飛,聽朝喺主場對住全NBA戰績第2差、僅得1勝15負嘅木狼,睇怕唔難大勝一場。

另外,尋日輸畀帝王96:109嘅籃網,已經錄得開季16連敗,只要下場再輸,就會追平由89年熱火同99年快艇創下嘅開季最長連敗紀錄,聽朝籃網作客衞冕冠軍湖人受讓10.5分,梗係捧湖人上盤送籃網一程啦!

白蘭芝