本文重點
「大帝」勒邦占士人見人怕咩？偏偏「波神」米高佐敦就驚都未驚過！呢位山貓班主尋日親自督師，喺山貓主場領軍出戰勁旅騎士，「波神」仲喺關鍵時刻頒下「神之旨」，下令全力進攻占士，向陷入個犯纏身嘅「大帝」施壓，最終山貓以94:87力克騎士，佐敦嘅波神決斷力點到你唔服先？
奧尼爾累死騎士？
勒邦占士平時落場作賽，對手防守要對佢進行夾擊，進攻對住佢就多數避得就避，偏偏「波神」反其道而行，睇準占士喺上半場錄得3次個犯，然後向隊員下達「進攻占士」戰術。結果負責執行「神之旨」嘅山貓球星謝勒華萊士，就喺下半場多次單挑占士成功，全場取得31分同14個籃板，帶領山貓取得勝利。至於「大帝」今仗雖然都有25分、6籃板同4助攻，但助攻次數係佢今季新低。
謝勒華萊士話：「佐敦除咗喺場邊打氣，仲教我哋點去打場波。佢睇穿占士防守有顧忌，最後我哋好成功咁完成任務。」
騎士輸波，其實除咗輸喺佐敦之手外，仲有可能要歸咎明星中鋒奧尼爾嘅復出。「巨無霸」喺休戰6場後終於再次披甲，但騎士喺佢在陣期間，只得6勝4負，反而佢缺陣就攞到5勝1負，奧尼爾加占士嘅大計明顯未達預期。