本文重點
籃網喺NBA頹勢未止，佢哋尋日主場出擊，全場11次3分球起手竟只得1中，命中率唔夠1成，拖累球隊以83:91不敵溜馬。賽後仲以11戰全敗淪為NBA史上開季成績第7差隊伍，好在控衞夏里士即將復出，希望救得番隊波啦！
賽前籃網已發起救亡行動，特別向每位持有季票嘅球迷多送2張波飛，一於要多啲人入場打氣！可惜今仗入場人數僅得11,332人，連帶全隊表現亦死氣沉沉，3分球11射僅得1中，受外線死火拖累之下最終以83:91不敵有格蘭加獨取22分嘅溜馬！
高比百次取40+湖人弗爆
連同今仗在內，籃網由開季至今已經連續11場全敗，呢個成績亦係NBA史上排第7最差！唯一慶幸係控衞夏里士已經傷愈復操：「我開始進行投籃練習，可能會喺周六正式復出。」
相比籃網，主場出擊嘅湖人喺高比拜仁射入40分之下，以106:93大勝活塞。今次亦係高比拜仁職業生涯第100次取得40分或以上成績，狀態咁弗，聽朝帶隊主場鬥公牛讓6分都捧上盤！