史堤芬積遜首戰即輸波

早喺暑假已經一直喊走嘅史堤芬積遜，日前終於如佢所願被交易，勇士用史堤芬積遜加艾斯羅交換山貓嘅貝爾同拉文奴域。據講史堤芬積遜一早已經喺密爾沃基隨時候命，收到經理人電話確認轉會後，立即飛去奧蘭多會合一班新隊友，所以尋日趕得切為山貓處子正選上陣，取得13分同9個籃板，可惜面對有主將劉易斯停賽10場後復出嘅魔術，最終作客仍然都以91:97敗北。

雖然首戰落筆打三更，但長遠嚟睇，史堤芬積遜加盟山貓，肯定可以改善球隊戰績，畢竟呢位小前鋒係上季除勒邦占士、韋迪同基斯保羅外，第4位有20分+、6次助攻同5個籃板+嘅球員，不過短時間就難搞啲，始終積遜加盟無耐，同新隊友欠默契，所以聽日山貓作客76人受讓1分都信唔過，芝士會捧76人上盤！