4屆NBA得分王艾佛遜，今季初加盟灰熊一度令人期待，可惜呢位34歲老將一直受傷患困擾，復出後又屈居後備，結果早前以「私人理由」暫時離隊，喺佢放假期間，外間一度盛傳佢會提早退休，呢件事令到灰熊好困擾，結果尋日球會喺官網正式宣布同艾佛遜達成共識提早解約。

無故離隊惹球會不滿

據講，艾佛遜喺今次解約中，只得到本來300萬美金年薪嘅其中極少嘅一部分作為賣斷費。「AI」只要度過嚟緊48小時嘅遣散期，就會正式成為一名自由身球員，可以同任何球隊傾加盟嘅事。

不過據《紐約每日新聞》嘅記者弗蘭克爆料，紐約人老細華殊已經對艾佛遜起晒痰：「華殊同我講，球隊正研究緊點樣簽艾佛遜。」

近8成紐迷盼AI加盟

事實上，唔止華殊，紐約人球迷亦支持羅致艾佛遜，喺《紐約每日新聞》網站嘅投票中，有44%認為「艾佛遜係紐約人急需嘅球員」，有35%球迷就認為「唔理好壞，艾佛遜至少令人感興趣」。不過據消息人士透露，黃蜂亦希望簽下艾佛遜，代替啱啱受傷嘅基斯保羅。究竟「AI」最後會花落誰家？大家就要拭目以待啦！