雖然話美國球迷好快就可以睇電視見到加素，但如果大家想喺球場上再見到加素，睇怕仲有排要等，事關呢位西班牙中鋒就連自己都唔知個大腿傷幾時好得番，佢淨係話會逐日進行復康練習，希望盡快痊愈。
加素由開季至今一直缺席湖人所有賽事，對於自己嘅傷患問題，加素都有啲無可奈何：「真係有排搞，我都只得個等字。我依家都只係逐日評估傷愈進度，但我對醫護人員工作充滿信心。」加素仲話一直好期待同新兵阿堤斯合作，期待能盡快重投球隊操練。
球員打生打死，都係為隻NBA總冠軍指環，上季加盟湖人即得嘗所願嘅加素，就話自己已將隻閃閃令嘅指環擺咗喺保險箱：「真係太閃，好似唔係好適合戴出街。隻指環對我嚟講真係太特別同有意義，我只係想擺佢喺個安全嘅地方。」