加素上季協助湖人重奪NBA總冠軍，演出大受好評，被視為現今NBA最全面中鋒之一，當然，佢目前嘅成就仲未可以同前輩相比，但講到拍劇成績，就似乎有後來居上之勢。早前曾客串過美國熱播劇集《數字追凶》，今次佢喺另一套王牌警匪劇集《CSI：邁阿密》正式擔演一集，由佢飾演嘅遊戲機公司老闆Victor，遇上一宗離奇車禍，引發起一連串風波。咪以為加素只係行行企企得兩、三句對白嘅「大咖」，實則佢係由頭演到落尾，演技差啲都好難過骨。

享受拍戲獲讚天分高

要記住對白走位，對於加素嚟講，隨時仲難過執行湖人教練積遜嘅三角戰術，但劇中主角Cibrian就大讚加素有天分兼認真，絕對唔會連累大家NG。雖然獲得唔少讚賞，但加素都承認拍劇對佢嚟講，其實係個大挑戰：「雖然拍劇好似好緊張，但我真係覺得演戲係好得意，我好享受。」

呢位西班牙中鋒仲話積尼高遜、阿爾柏仙奴同羅拔迪尼路都係佢偶像。眾所周知，積尼高遜係湖人天字第一號粉絲，不過加素就話唔敢向佢請教演技囉：「平時見親佢，我都係打緊波，冇乜機會同佢傾偈。再講，我都唔係好敢問佢點做戲，試諗吓，又有幾何有球迷嚟向我請教點打波吖？」

唔敢向積尼高遜請教

球員生涯時間有限，但加素暗示自己唔敢諗話退休後轉做演員：「好似好遙遠喎！依家我嘅夢想只係贏更多冠軍，同組織我嘅家庭。我雖然鍾意演戲，但要做演員，我諗我仲要付出多幾倍嘅努力，我好少會定一個難以實現嘅夢想囉。」又難怪嘅，要搵人同個7呎巨人拍檔做戲，又好似難咗啲喎。

加素資多啲

出生日期：80年7月6日

國籍/位置：西班牙/中鋒

身高/體重：2米13/113公斤

曾効力球隊：巴塞隆拿、灰熊