新教頭上任即輸波

啱啱炒咗史葛嘅黃蜂，尋日首次由原任球會GM嘅保華，以兼任教練身份帶隊出賽，本來初段打得唔錯，可惜「蜂王」基斯保羅喺第三節尾段，跳起交波畀曉頓岩士唐入樽後落地時左腳拗柴，要由隊友攙扶離場，成為黃蜂最後輸波嘅主因。拓荒者今場得分非常平均，其中中鋒艾迪列治比較突出，取得20分同13個籃板嘅「雙雙」佳績。

基斯保羅尋日預計大約有75名親朋戚友入場撐佢，點知自己打咗30分鐘只得3分，後尾仲傷埋，賽後佢表示自己肯定缺席下場對鷹隊，仲未知要抖幾耐：「我好討厭睇住球隊輸波，更加討厭知道下場唔出得。」黃蜂呢幾年成功崛起，可謂全靠「CP3」基斯保羅，依家冇咗佢絕對晴天霹靂，保華一上任就遇到咁大挑戰，嚟緊幾晚肯定冇覺好瞓都得！