尋日呢場賽事係兩隊自上屆季後賽西岸決賽交手後首次碰頭。其實湖人喺上半場打得唔錯，高比拜仁仲射入19分，點知下半場嚴重走樣，1分都攞唔到，累湖人成個下半場加埋只得23分，比起全場射入25分嘅金塊射手安東尼仲要少2分，當中喺第3節更加恥辱性只得8分，被金塊追平球會史上單節失分最少紀錄，相反湖人就創出球會史上單節得分第2低紀錄，佢哋喺77年喺對公牛時曾經單節得6分。

賽後高比拜仁非常沮喪：「金塊今日將我哋推落地獄，我唔知如果我哋有加素會唔會唔同，但老實講，金塊今日真係打得好好。」至於安東尼則表示：「呢場勝仗對我哋非常重要，我知可能嚟得太早，但我想同NBA所有球隊講，唔止湖人，我哋都有力爭標。」

阿堤斯Mark唔住安東尼

其實湖人教練積遜賽前曾經透露會用阿堤斯以1-on-1形式Mark安東尼，可惜完全起唔到作用。雖然上半場受個犯困擾，但安東尼喺下半場勁入18分，賽後安東尼牙擦表示：「我唔認為有人可以阻止到我，冇球隊會傻到畀我1-on-1挑戰佢哋。」

湖人搵火箭出氣博翻身

輸畀金塊後，湖人6連勝走勢亦告一段落，但聽朝返番主場對火箭，相信可以反彈，畢竟湖人整體實力喺火箭之上，只要高比發揮番應有水準，小讓3.5分要開上盤絕對綽綽有餘。

放大圖片

放大圖片