本文重點
今季表現持續勇銳嘅「閃電俠」韋迪，尋日帶領熱火主場迎戰巫師，除咗話將另一位頂級殺手亞連拿斯技術擊倒之外，仲協助熱火後來居上反勝90:76，以開季6勝1負成績續居東南區「一哥」之位。韋迪今期着晒火，聽朝帶領熱火迎擊表現反覆嘅騎士，讓3分值得睇好。
全場射入41分嘅韋迪，係今季3位先後喺2場以上賽事攞到40分以上嘅球員之一，得分能力驚人，更抵讚嘅係佢半場發揮強大領軍能力，用言語激勵起隊友鬥志，成為今仗反勝嘅關鍵。至於巫師輸波，最羞家肯定係亞連拿斯，皆因佢全場錄得12次失誤，係NBA史上第18個單場有12次以上失誤嘅球員。
西岸榜首戰捧太陽
聽日NBA有兩場大戰，頭場熱火對騎士，會睇到韋迪硬撼「大帝」勒邦占士，然而騎士喺奧尼爾加盟之後，表現一直未達預期，今次作客熱火真係有多少隱憂。至於尾場上演西岸「一哥」之爭，湖人將會喺主場出戰奇兵太陽，鳳凰城今季喺2屆MVP拿殊嘅精彩演出帶動下，表現突出，作客受讓5分，應該可以搵到着數。