話說比賽去到最後0.6秒，金塊嘅比立斯射入完第一個罰球後，刻意射失第二個罰球，希望拖到夠鐘，公牛嘅諾亞搶得籃板後即刻嗌暫停，當時大鐘停喺0.3秒。喺中場再開波嘅公牛之後由軒域治交畀葫蘆頂嘅畢米拿，後者第一時間跳投得手，當時所有公牛球員同球迷都陷入瘋狂慶祝狀態，以為反勝91:90，但球證最後經過長達10分鐘反覆翻睇片段後，終判畢米拿係喺完場之後先出手，公牛慘食詐胡。

空歡喜一場接受判決

金塊主力比立斯知道贏波後寸爆咁話：「我睇佢出手就知過鐘啦！我一直都係坐喺度笑，唔係笑佢哋個投籃，係笑佢哋個反應。佢哋個個喺度跳晒舞慶祝，好似小朋友咁，我愈睇愈覺得過癮，咁樣完場真係冇得頂。」比立斯攞到17分同6個助攻，至於隊友安東尼就錄得個人今季新低20分。

相比起比立斯嘅無禮，公牛上下都顯得大方。教練迪尼高就話：「球證點都要做決定，佢哋睇片都超過20次，可能個波真係未離開佢手指尖啩？」就連小前鋒鄧格都認同，0.3秒應該係冇可能及時起手。

JR史密夫改名腳頭好

另外值得一提，停賽期滿，今季首次為金塊上陣嘅JR史密夫，就宣布新球季會用番自己真名埃爾史密夫，放棄咗代表「Junior」嘅JR名字。換新名後佢都算好腳頭，攞到5分協助金塊贏波。