明鬥火箭睇高一線

勇士球星史堤芬積遜喺今年暑假頻頻搞事，先喺8月公開要求離隊，結果被聯盟重罰25,000美金，到之後喺對湖人一場熱身賽中又同教練尼爾遜鬧交，被內部罰停賽2場，兼被扣起139,000美金人工，繼而宣布交出隊長一職：「我唔想再做主角啦，搵我做隊長實在超出咗我嘅能力。」

不過呢位前溜馬球星喺今個月中已經開始軟化，緣自一班隊友仍然好重視佢：「有啲球員已經冇叫我做『Captain Jack』，但有啲仍然繼續咁叫我。」正因為咁，史堤芬積遜近日終於認錯，又搞BBQ、又約去餐廳食飯，最後仲搞埋碌齡，就好似之前做隊長一樣，搞番好隊波嘅士氣，聽日喺今季NBA首戰，主場對住缺少姚明同麥基迪嘅火箭，相信可以帶領勇士打響頭炮。