本文重點
各支球隊早排紛紛進行熱身賽谷起狀態，務求做好準備迎接新球季，當中以安東尼嘅表現最神勇！呢位金塊前鋒清減不少，仲以勁爆演出成為季前賽得分王，風頭蓋過晒高比拜仁、勒邦占士同基斯保羅等球星，新季絕對值得留意！
膺熱身賽得分王
丹佛金塊共進行8場季前賽，安東尼平均每場貢獻24.7分，成為季前賽得分王。別以為熱身賽人人懶懶閒，安東尼先有咁犀利數據，查實佢今年暑假勁落力做健身，減掉12磅，脂肪比例亦由8.6%跌到7%，身形fit到不得了。
據講安東尼操練態度十分積極，朝朝都係佢最早返到丹佛個訓練基地，佢仲信心爆棚咁同記者話：「我照足營養餐單進食，個人清減咗唔少，依家我嘅狀態係前所未有咁好，真係急不及待想快啲落場比賽。」金塊周四朝早會於主場恭候爵士，展開新季首場比賽，睇怕爵士教練史龍要諗諗計防吓安東尼先得！