卡特因為喺00年入樽賽，以多下超誇張嘅入樽贏得冠軍，加上喺當年奧運，跳過7呎2嘅法國中鋒韋斯入樽，奠定「飛人」地位。另外，卡特為人熟悉就係有一個同樣打NBA嘅表弟麥基迪，兩人當年喺速龍合作無間，至今仍令人津津樂道。
不過兩表兄弟同樣仕途坎坷，麥基迪由速龍轉投魔術，雖然令佢成為得分王，攀上職業生涯最高峰，但到今時今日已轉投火箭數年，仍然敵不過季後賽首圈出局魔咒（今季麥基迪因傷冇份打季後賽）。
卡特雖然冇麥基迪咁「黑腳」，但打咗12年NBA，一樣同冠軍無緣，一心諗住拍埋傑特會有機會一嘗冠軍滋味，可惜近年東岸勢力不斷抬頭，韋迪、占士、加納特等等猛人雲集東岸，實力較平庸嘅籃網自然難發圍。或者兩表兄弟可以諗吓再次合作，話唔定會有驚喜呢！