正當大家開始期待尋日加盟騎士嘅奧尼爾，可唔可以拍住勒邦占士，贏得下屆NBA總冠軍嘅時候，勢估唔到相隔唔夠一日，佢哋喺東岸嘅競爭對手魔術立即出招，以艾斯頓、哥特尼李爾同巴迪爾，交換籃網嘅卡特同賴恩安達臣。當中卡特係聯盟數一數二嘅球星，上季効力籃網，平均每場有20.8分、5.1個籃板同4.7次助攻，同勒邦占士比起一啲都唔輸蝕，加上杜域侯活同奧尼爾兩位當今聯盟最強嘅中鋒，呢兩對「人、獸」配對碰，肯定成為下季NBA焦點。

力抗奧尼爾占士

魔術總經理奧特斯史密夫表明簽入卡特嘅目的就係爭總冠軍：「卡特加盟帶畀我哋經驗同得分能力，尤其喺比賽嘅關鍵時刻。我哋嘅目標同上季一樣，就係贏總冠軍，我相信魔術加入一位星級球員之後，一定可以實現呢個夢想。」

唔好話球迷，其實呢單轉會連卡特本人都意料唔到，據講佢尋日喺籃球訓練營聽到呢單消息時，仲以為對方講笑，不過「飛人」對於重返家鄉奧蘭多加盟魔術表現得好開心：「我相信每位NBA球員都希望人生中攞一次總冠軍。加盟魔術對於我嚟講就好似夢想成真，因為我依家將會有機會贏總冠軍。」

太陽史杜迪米亞1換5

其實隨住下季尾有好多球星會成為自由身，各支NBA球會近日都積極換走高薪球員，希望騰出薪金為下季鋪路，據講太陽已經同勇士達成協議，進行一宗「1換5」交易，以明星級中鋒史杜迪米亞交換比特連斯、阿蘇布基、比連尼利、班特胡禮，以及啱啱以第7籤加盟勇士嘅新秀史堤芬居里。

飛人小檔案

年齡：32歲

國籍：美國

身高：6呎6吋

體重：100公斤

位置：得分後衞

小前鋒

曾効力球會：速龍

籃網

榮譽：8屆明星隊

最佳新人

1屆入樽王

1屆奧運金牌