雖然成為湖人贏波功臣，但其實費沙係開段表現勁曳，頭5個3分波全炒，不過呢名老將喺關鍵時刻卻突然嚟料，先喺完場前4.6秒冷靜地喺魔術後衞尼爾遜面前射入三分，追成87平手，再喺加時完場前31.3秒再射入多一個三分，幫魔術埋單。

職業生涯最重要入球

賽後有記者將費沙呢球，同佢喺04年季後賽西岸4強第5戰，喺完場前0.4秒入波帶領湖人反勝馬刺74:73作比較，不過費沙話尋日呢球仲經典：「呢球已經升上我職業生涯中最重要入波嘅No.1，因為呢球令我哋更接近總冠軍。」今場射入32分嘅高比拜仁亦大讚費沙：「費沙嘅信心真係勁到冇人有，我諗成個NBA，冇人射最後一球好似佢咁淡定。」事實上，費沙喺NBA總決賽已經累積射入30個三分，僅次於荷利（56個）同米高佐敦（42個），陶告魯同劉易斯真係要行埋一邊。

Game 5周一開打

其實杜域侯活尋日已經冇得頂，攞到16分同21個籃板，仲造出破總決賽紀錄嘅9次封波，可惜14個罰球足足炒咗8個，包括法定時間完場前11秒嘅兩個關鍵罰球。輸波後，魔術喺總場數已經落後1:3，嚟緊一定要直落贏3場，先可以後上攞總冠軍。NBA總決賽第5戰，將會喺香港時間周一朝早8時展開。

周五戰果 前者為主場

魔術 91:99 湖人* *代表一次加時