本文重點
橋唔怕舊，最緊要受！湖人教練積遜向來奇招百出，喺訓練期間播電影更加係佢嘅拿手好戲，湖人依家喺總決賽同魔術鬥到難分難解，積遜終於又使出「煲戲」秘密武器，今次佢就當住全隊球員播《天魔特攻2：鬼魅兵團》，希望高比拜仁可以化身「地獄之子」帶領湖人稱霸世界。
學超級英雄稱霸世界
湖人喺Game3輸波之後，爭取第十五個總冠軍又出現變數，積遜教練日前即刻發功，繼西岸決賽對金塊期間播《大魚奇緣》收到理想效果後，呢位「禪師」今次又借《天魔特攻2：鬼魅兵團》嚟鼓勵球員，佢將呢套科幻片嘅片段剪輯夾雜喺前三場嘅比賽影片中，等球員領略當中含意。
《天魔特攻2：鬼魅兵團》故事圍繞一班相貌奇特但身懷絕技嘅超級英雄，喺「地獄之子」率領下克服重重困難，對抗黑暗勢力，阻止地球落入壞人手中。孭飛球星高比拜仁似乎就要充當湖人嘅「地獄之子」，「小飛俠」揚言必定完成捧盃任務：「我哋往往可以喺失敗後立即反彈，我哋要一直贏落去，直到捧走冠軍為止。」