本文重點
湖人日前喺總決賽擊敗魔術，總場數領先2:0，球員固然開心，不過佢哋入到更衣室更加興奮，事關法國足球巨星亨利，竟然親身到訪探班兼打氣，仲向每位球員送自己親筆簽名嘅波衫，大大提升湖人嘅士氣。
高比否認退休
前湖人球員圖列夫同佢嘅法國同鄉、足球巨星亨利，日前喺湖人喺總決賽第二回合擊敗魔術後，入更衣室探班。當中圖列夫認真有義氣，特別買咗十幾件波衫，然後叫亨利簽名，送畀湖人嘅球員。而亨利見到愛隊嘅球員，同每位「偶像」都傾得好開心，難怪事後湖人眾球員都大讚亨利好nice。
另一方面，美國近日廣泛流傳，指高比若今屆成功取得第四枚NBA總冠軍指環，將會效法米高佐敦急流勇退，不過「小飛俠」已否認傳聞：「我好鍾意打籃球，覺得自己仲有好多地方改善。好多謝上帝令我一直保持健康，我會繼續努力！」教練積遜更揚言：「我覺得高比可以打到37歲！」