本文重點
用「集天下兵器」嚟形容之前出戰馬來西亞「滙豐亞洲五國欖球賽」嘅中國隊，一啲都唔過分！喺呢支十八人大軍之中，有男飛人、教師、解放軍，亦有推鉛球選手、獨木舟省隊代表，乜人都有，絕對稱得上係最強雜牌軍！
7成隊員為解放軍
球隊副隊長陳健，原本係河北省獨木舟代表，因未獲國家隊垂青，所以毅然「轉行」打欖球，就係咁畀佢搵到屬於自己嘅出路，依家仲兼任埋國家隊副教練，認真威水！
嚟自中國農業大學嘅三位老師余國、袁峰同朱培厚，曾經都係短跑好手，閒閒哋十秒幾就跑完100米，三人齊齊轉投欖球界，齊齊發揚光大。
不過，講到國家隊嘅「大戶」，梗係解放軍啦！國家隊基本上有七成隊員都係軍人，當中擔任隊長嘅胡明更係軍中「膊頭有花」之輩，唔怪得成隊波上下都聽晒佢話啦！