莫講話球迷估唔到，就連金塊老闆高安基都估唔到隊波咁叻仔殺到入西岸決賽。在商言商，利益行先，高安基晨早協議將百事中心球場租畀WWE（世界摔角娛樂）。
WWE係以戲劇風格進行摔角比賽，雖然唔係堅打，但喺美國甚至世界各地都有唔錯收視，《蠍子王》Dwayne Johnson同歌、影、摔瓣瓣掂嘅John Cena（圖）都係大明星。
WWE會定期巡迴演出，早排就落實租用丹佛嘅百事中心球場，喺聽日5月26日舉行比賽。呢日正正係金塊火併湖人嘅Game4日子，當初金塊老闆根本估唔到球隊會有咁好成績，家陣撞晒期，場摔角Show又賣咗過萬張門票，WWE總裁麥馬漢於是就狂窒高安基：「高安基身為老闆都睇死隊波，點搞呀？」
經NBA高層出手，金塊將會如期喺百事中心出戰，而湖人就做好人借自己個場畀WWE用，難怪John Cena即刻化身湖人Fans，拍咗條短片窒金塊添，相當搞鬼，大家可以去睇吓。
www.youtube.com/watch?v=h39HYZRLJi0。