甜瓜安東尼季後賽反擊戰
六年前嘅遴選，勒邦占士同安東尼分別以「狀元」同「探花」身份登陸NBA，今時今日「大帝」撈到風生水起，仲以大熱姿態當選常規賽MVP添，可憐同期出道嘅安東尼就冇呢種命，無論身價、榮譽、人氣都比占士輸一大截。
連續5屆首圈出局
安東尼全名係Carmelo Anthony，當地以Melo作為佢嘅花名，即「甜瓜」咁解。不過安東尼嘅季後賽回憶一啲都唔甜，皆因金塊連續五屆Playoffs都喺首圈止步，安東尼就係陣中唯一經歷晒五次失敗嘅球員，黑仔到不得了！
曾經因為亂起手畀卡爾教練重插嘅安東尼，喺西岸決賽第一戰獨取39分，投射命中率高達七成，愈趨成熟嘅表現令球迷感到安慰，甜瓜成熟時，正正係安東尼享受甜美球季嘅時候。
安東尼
出生日期：1984年5月29日
身高：6呎8吋
位置：小前鋒
安達臣忘記辛酸鳥人起飛
講到地位，基斯安達臣喺金塊只係散仔，但講到個Look同人氣，呢位「鳥人」就肯定係丹佛潮男！咪睇安達臣其貌不揚，查實佢份人相當姿整，每逢比賽前例必落重Gel「臘」行個頭，據講每次佢都會用晒成罐Gel，所以成場波撲嚟撲去之後，安達臣個「雞頭」依然係咁「堅挺」，依然係屹立不倒！
Gel行雞頭打好防守
安達臣打法滿場飛，場均2.5次封波嘅驚人防守數據拍得住「魔獸」侯活。加上佢成身冇忽好肉，兩邊胳肋底對落紋咗一對翼，每次入完樽仲會整個大鵬展翅嘅慶祝動作，「鳥人」個朵就係咁得嚟。
「鳥人」帶畀球迷激情同歡樂，會方仲特登推出安達臣Tee搵銀，結果反應出奇咁好，生產量比預期多出三倍。安達臣家陣人氣爆燈，但佢亦都有一段辛酸史，三年前因為服食禁藥遭罰停賽兩年，安達臣諗番起都驚：「我曾經好孤獨，我曾經失去晒所有嘢！」
一切已成為過去，「鳥人」學懂珍惜球員生涯嘅寶貴光陰，用表現嚟贏番尊重，繼續振翅高飛！
基斯安達臣
出生日期：1978年7月7日
身高：6呎10吋
位置：大前鋒
比立斯吃盡苦頭草根國王
咪睇比立斯家陣有頭有面，查實當初佢加盟NBA嘅時候有一段苦不堪言嘅經歷。比立斯當年係科羅拉多大學嘅球星，憑住出色表現入選咗全美最佳陣容二隊。大學時期已經響晒朵，諗住去到NBA會一帆風順啦，殊不知貴為探花嘅佢遲遲融入唔到NBA，頭六個球季就轉咗五次會，畀人當做垃圾咁掟嚟掟去！
轉會人球活塞封王
吃得苦中苦，方為人上人。比立斯堅持自己嘅信念，2002年夏天轉投活塞之後終於重獲新生，仲喺04年帶領球隊爆冷登上NBA總冠軍寶座，自己亦都榮膺季後賽MVP，用行動證明默默耕耘係可以獲得成功，從而贏得「草根國王」呢個稱號！
喺丹佛土生土長嘅比立斯，今季化身「家鄉英雄」成為金塊殺入西岸季後賽決賽嘅功臣。轉會轉得多，比立斯咩風浪都見過，家陣金塊去邊到比賽，佢都可以同任何一位對手攬頭攬頸打牙骹。艱苦嘅路途走到嚟職業生涯嘅尾聲，比立斯呢種「苦」嗒到最後終於開始甘。
比立斯
出生日期：1976年9月25日
身高：6呎3吋
位置：控球後衞
JR史密夫辣車闖禍專心打波
辣，除咗係話JR史密夫啲3分波射得夠辣之外，查實佢手車仲辣，辣到可以殺死人！事緣兩年前史密夫喺新澤西因危險駕駛炒車，同行嘅老死貝爾喺呢次意外身亡，若非罪名不成立，史密夫已經入咗冊依家仲踎緊。
強勁第6人愛派波衫
試過八個月內五度停牌，家陣亦有七次超速駕駛紀錄，但自從貝爾過身之後，史密夫成個人變晒，佢老竇同記者話：「貝爾同史密夫由細玩到大，自從嗰次之後，史密夫沉默咗好多，依家嘅佢唔會再周圍搞事，只會專心打波。」
果然，史密夫今季表現大爆發，常規賽對帝王一戰仲怒轟11個3分波，攞到職業生涯新高嘅45分，季尾仲獲選為最佳第六人亞軍添。唔止表現大躍進，史密夫亦愈嚟愈識撈，每場波之後都例牌將自己件波衫掟上觀眾席。有人幫史密夫計過數，佢咁送波衫法每季就要蝕成18,450美元，不過史密夫就一啲都唔介意，仲愈送愈辣添：「為咗啲球迷，使些少錢冇所謂。」
JR史密夫
出生日期：1985年9月9日
身高：6呎6吋
位置：得分後衞
金句王卡爾
成功戰勝前列腺癌嘅卡爾，教波二十四載經歷晒高低起跌，份人亦變得樂觀，家陣接受親訪問都「黎明上身」，硬係要爆番兩口金句搞氣氛！
甜：卡爾金句
「一個被遺忘嘅小朋友終於成熟！」
酸：卡爾金句
「我知有球迷整咗個bringbackthebirdman（把鳥人帶回來）網站，幾有意思吖！比firegeorgekarl（炒掉卡爾）好得多。」
苦：卡爾金句
「金塊冇比立斯嘅話，我份工仲保唔保得住都係未知數。」
辣：卡爾金句
「唔理你認唔認同，我覺得JR同高比拜仁有啲似，話唔定佢就係Kobe嘅接班人。」