NBA作為世界上最受歡迎賽事之一，大家係咪以為賽事嘅獎金一定非常豐富呢？不過事實就同大家諗嘅完全相反，今個賽季NBA嘅總獎金額只係得1,100萬美元（約8,500萬港元），就算捧走總冠軍嘅球隊，都只大約分到三百幾萬美元，認真寒酸！
相比起足球第一大賽事歐聯嘅冠軍總獎金2,190萬鎊，NBA簡直係小巫見大巫，根據歷年NBA獎金變化，賽會喺2006年先至突破1,000萬美元，今季亦只係得1,100萬美元總獎金。賽會根據球隊喺常規賽排名同季後賽表現分配獎金，以常規賽成績最好嘅騎士為例，就算佢哋真係贏到總冠軍，最終所得獎金大約都係320萬美元！事實上一眾NBA球隊向來靠龐大廣告、轉播同門票收入支撐，獎金？算罷啦！