本文重點
牡丹雖好都要綠葉扶持，湖人有超級球星高比拜仁領軍得分唔使憂，不過喺西岸決賽一樣要好幫手阿利沙幫拖先贏波！尋日進行嘅Game3賽事，阿利沙再次喺關鍵時刻化身「神偷」搶截金塊攻勢，加上高比拜仁獨取41分，協助湖人以103:97反勝，總場數領先2:1。
湖人場數領先2:1
湖人同金塊大戰場場峰迴路轉，連同今場在內，首節領先球隊最後都輸波收場，Game1湖人靠阿利沙喺最後一分鐘偷走安東尼卡達個波反勝兩分，尋日一仗阿利沙故技重施，完場前36秒只領先兩分下，偷走安東尼嘅波兼博到對方犯規，之後射入埋兩個罰球，成為湖人贏波關鍵。
阿利沙交足貨，高比拜仁亦繼續光芒四射，今場攻入41分（職業生涯第九次季後賽得分達40以上），創下湖人喺西岸決賽頭三場總得分紀錄（113分）。依家湖人着晒火，聽朝作客金塊受讓3.5分都冇問題，下盤信得過。