本文重點
湖人同火箭惡鬥成為今年季後賽最刺激賽事之一，上場Game6比賽更加打破ESPN歷來NBA收視紀錄，呢場比賽全美總共有七百三十五萬人收睇，打破○六年東岸決賽熱火對活塞紀錄（六百六十萬人），第七場生死戰有機會再創新高！湖人教練積遜唔想再令球迷失望，竟然借電影《大魚奇緣》（小圖）嚟指引球員，「禪師」果然名不虛傳！
積遜作為NBA史上最成功教練之一，執教風格亦係別具一格，尤其喺季後賽經常會播電影嚟啟發球員，近期球員不斷翻睇同火箭前六場比賽嘅錄影片段，希望搵出球隊不足地方，點知積遜就將電影《大魚奇緣》嘅片段穿插喺影片入面，實行用最「禪」方法指引球員。
湖火Game6破收視紀錄
湖人前鋒禾頓就話：「我哋一齊睇《大魚奇緣》，當時大家都唔明點解，或者係佢想我哋明白人生係充滿神奇際遇，又或者係話我哋爭總冠軍之路會有好多神奇經歷。」據聞積遜仲喺湖人更衣室嘅白板上面仲寫住「9 MO W'S」，意思係「仲差九場勝利」（贏總冠軍）！