財政司司長鬍鬚曾去年搞搞新意思，喺預算案中提出引入美食車計劃，事隔一年終於有聲氣，但只係開始接受申請同評審，距離正式開檔仲有漫漫長路吖！

係咁嘅，美食車先導計劃今日開始接受申請，港府將整個程序分為兩個階段進行，首先係評審申請者嘅計劃書，包括主題及財務狀況等，之後舉辦烹飪挑戰賽，選出十六位最高得分者參加計劃。當局話喎，為鼓勵初創人士及微型企業參加，會對有關申請人給予額外評分，而且提供最高三十萬元貸款，預計八月可以完成評審程序。

即係咁，引入美食車主要目的係推廣旅遊，當局搞噱頭辦烹飪大賽，本來無可厚非，問題係，美食車計劃姍姍來遲，仲要阿茂整餅，冇嗰樣整嗰樣，究竟幾時至可以成事o架？正如有人話齋，港產官僚整色整水就叻，做正經事就冇瓣掂，最怕美食車計劃雷大雨小，最終又唔湯唔水，成為一場笑話咋。

做生意講求效率，早着先鞭，港產官僚推廣美食車慢條斯理，執輸行頭，想有運行都幾難。呢，新加坡繼推出聖淘沙島、環球影城等大型景點後，近日又催谷新旅遊推廣計劃，以推介周末特備節目及航空公司優惠吸客，都唔知幾進取。反觀港府議而不決，拖拖拉拉，簡直相形見絀。

講開又講，美食車就算最終可以開檔，效果係點仲係未知之數。係人都知，香港地方細小，限制多多，加上港產官僚墨守成規，唔識變通，連黃大仙騰龍墟都捱唔住，連天水圍天秀墟都搞到一鑊泡，何況係美食車。仲有吖，當局話就話會為申請者提供貸款，但入場門檻依然唔低，閒閒哋需要數十萬元，唔係一般市民可以負擔得起，最後隨時又畀大集團玩晒嘅咋。

最離譜嘅係，當局一味崇洋，規定美食車以售賣熱狗薯條等西式小食為主，牛雜雞蛋仔等本地特色美食免問，你話係咪捨近求遠吖？

所以話，香港旅遊業無以為繼，唔係冇道理o架。啱啱過去嘅復活節長假期，海洋公園客量比去年明顯下跌，今年初至今仲錄得雙位數跌幅添，除咗因為今年天氣特別寒冷，更因為內地旅客持續減少，如果港府再唔盡快推新措施救亡，點止海洋公園流血不止，整體經濟都受衝擊，到時就算有美食車都救唔番喇，叮！