SUN揭秘：堂食須洗碗 熟客攜盒外賣
「鬍鬚仔」李恩鑑對製作食物有一份執着，情願「賣少幾碗」也要保持食物質素。慢煮大廚李恩鑑表示，每碗「好難吃牛肉麵」製作需時約十五至二十分鐘，烹調過程絕不簡單，「麵只係普通上海麵，但秘訣就係一定要過冷河，出面整通常都為咗要快，冇做呢個步驟。」
專程由大埔中心前來光顧的食客潘先生，一臉滿足地帶同外賣食物離去。
牛肉厚切保口感
為求精益求精，「鬍鬚仔」堅持麵湯湯底需以牛骨熬製，並加熱至攝氏一百二十度，牛肉則需厚切，否則會沒口感，又強調台灣牛肉麵的精髓在於旁邊的酸菜，「酸菜唔得嘅話，就算牛肉、麵同湯有幾好，都只係值七十分。」
「有時啲人放飯，六七個人一齊來，咁多碗麵都真係幾難煮。」即使如此，慢煮大廚「鬍鬚仔」仍貫徹其「寸嘴」營業態度，堅持逐碗逐碗煮。「食過好幾次，感覺老闆製作食物好認真。『寸』又唔會趕客嘅，反而覺得呢間舖好特別。」 居於大埔中心的潘先生表示，雖住址與廣福街市相距不近，但仍不時專程到場幫襯，是日潘自備膠盒外賣食物回家享用。原來「鬍鬚仔」還有一個很寸的習慣，就是要熟客堂食後自行洗碗。「外賣仲好，喺度食又要幫佢洗埋碗。」
