城中鏡：傳承專家
尋日城市大學舉辦第二屆僱主午宴，廣邀近三百間企業管理層同城大學生交流，早啲畀學生見識潛力僱主，「贏在起跑線」。聽日起正式退下火線嘅大家樂集團主席Michael陳裕光，近年唔使再幫公司揀蟀，反而創辦傳承學院，協助華人家族第二代做好接班工作，避免家族成員陷入爭產糾紛。不過，身兼菱電集團主席嘅城大校董會主席Herman胡曉明就話唔使幫襯Michael，因為兩個囝囝各有理想，打算將公司交畀有志者打理。
陳裕光（左）退休後，積極協助華人家族做好傳承工作。
胡曉明強調唔會逼兩個囝囝接手家族生意。
葉豪盛大讚年輕人善用社交媒體營商。
當年繼承父親胡法光生意嘅Herman認為兩個囝囝各有志向，分別攻讀心理學同生物工程博士，唔想強迫佢哋返公司幫手，而且好多家族成員糾紛正正係源於一家人自己傾唔掂數，與其係咁，佢打算退休後將生意交畀管理層打理，唔使擔心爆爭產。
聽日起正式退下火線，轉任集團非執行董事嘅Michael笑言，退休後會同太太去科學園踩單車，對於現今年輕人，佢笑言係「一代比一代強」，佢引述晚清名臣李鴻章話「一代人只能做一代人的事」，但唔少華人家族遲遲都唔肯放手畀下一代接棒，即使妥善管理財富，仍然引發家族成員爭產，但佢認為傳承家族理念，處理好家族成員關係比財富管理更重要。
葉豪盛：年輕人有創意
城大副校長（學生事務）葉豪盛教授亦都話年輕人善用社交媒體營商，網民嘅「讚好」同「分享」唔多唔少都反映市場實況，加上年輕人創意無限，只要僱主為佢哋營造輕鬆、有屋企感覺嘅工作環境，畀員工自由發揮，相信年輕人都唔想錯過呢份「好工」。
