中華廠商聯合會籌辦工展會多年，喺兩岸四地亦曾舉辦工展會，推廣本港品牌，原來最新大計係涉足網購，打算舉辦「網上工展會」。

李秀恒（左）同吳永嘉（右）搭晒膊頭，互相支持競逐廠商會嘅立法會議席。

廠商會副會長兼展覽服務公司主席戴澤良尋日喺傳媒午宴上話，唔少人喺工展會購物，之後都會致電查詢喺邊度可以買番嗰啲產品，廠商會依家正籌備網上工展會，第一個目標係深圳前海，下一步可能會喺武漢、橫琴同廣州等地開展。形式方面，就係設立實體店舖展出本港產品，想買嘅人睇完可以喺網上買，至於會用邊一個網購平台，就視乎該地區最多人用邊個，並無規定。

另外，盛傳廠商會會長Eddy李秀恒同副會長Jimmy吳永嘉都有意競逐廠商會嘅立法會議席，Eddy話未考慮係咪參選，會支持所有有意參選嘅副會長，但又唔能夠話有副會長參選，自己一定唔選。Jimmy就話支持Eddy同所有有心有力服務嘅人，而自己就樂意喺任何適合嘅崗位服務。呢一刻大家都咁禮讓，唔知遲啲會點呢？

第一手消息請下載on.cc東網iPhone/iPad/Android/Windows Phone Apps