每逢立法會開大會期間,秘書處都會為議員提供午餐、晚餐同茶點水果。呢啲費用亦會由議員共同分擔,而剩餘嘅食物亦會捐贈予註冊慈善團體「膳心連」。

不過,原來喺過去三個立法會會期,一眾議員都化身成「大嘥鬼」,每個會期都剩餘超過七百公斤的食物,相等於超過七十包十公斤嘅米,難為呢個世界有人無飯食。

根據立法會秘書長回應議員有關立法會開支嘅提問,自一三年開始,秘書處會將議員所剩下嘅食物捐贈畀「膳心連」,用作轉送有需要人士。而喺一三至一四年度的會期,所捐贈的食物重達七百六十一點三公斤。其後喺一四至一五年度嘅會期,雖然所贈嘅食物已減至七百三十點五公斤,但仍然係超過七百公斤。

至於由舊年十月起截至今年二月,立法會捐贈嘅剩餘食物則重達三百一十二點五公斤,現時會期只過咗一半時間,若照現時情況,今個會期需要捐贈嘅剩餘食物應該唔會再多達七百公斤。不過,食剩嘢始終都係壞習慣,眾議員唔做「大嘥鬼」當然係最理想啦!

第一手消息請下載on.cc東網iPhone/iPad/Android/Windows Phone Apps