政壇：搞搞政：長毛打爛沙盆 狂問法院鼠患

長毛提出較為正路嘅問題係查詢各級法院法官同司法人員薪酬及編制、過去三年司法機構同內地有關部門交流或活動詳情、投訴裁判法院數字。有啲問題細緻到九龍城裁判法院的保安公司名稱、合約期、持牌保安員數目；過去五年升降機維修次數、日期、時間；有冇無障礙設施、聘用殘疾人士、節約能源，以至外判保安員係咪有劃一制服；而各個法院清潔、滅蟲及滅鼠次數都有問到。

擬為日後示威提問

跟住又問九龍城裁判法院露明道門口同屯門裁判法院地下唔准泊車位置，過去三年有幾多私家車或電單車違例泊車。最有趣嘅係，佢問及當有人喺九龍城裁判法院示威，法院有冇通知警方喺法院範圍維持秩序？令人懷疑佢為自己日後示威提問。

長毛回應話司法機構一向較少人理會，但近年開支以倍數上升，下年度就增加百分之十三點五，佢只係「想知點使公帑」，純粹了解一下。至於係咪為咗投訴法院，佢未有否認，只稱「投訴人哋，唔可以亂嚟」。根據司法機構回覆，近幾年五個法院每年的清潔同滅蟲鼠服務費用逾三百萬元，而每年滅蟲滅鼠工作超過二十五次，莫非法院啲蟲鼠患好嚴重？

其他議員亦有問及各類數字，截至今年三月八日，喺各級法院展開與佔領行動有關嘅案件共有九十宗，六十六宗屬刑事，二十四宗屬民事；由裁判法院處理與旺角暴亂有關案件共五十宗。至於舊年入稟申請司法覆核許可有二百五十九宗，司法覆核案件則有七十七宗。另舊年有二萬一千多宗入稟離婚個案，較舊年微跌五百宗。