政壇：建制驚弓鳥 退出地區組織
話說中西區區議會喺一四年通過政改宣傳撥款，當時白鴿黨激進「乳鴿」區議員「峯鴿」許智峯批評建制派黑箱作業，以閉門方式撥款畀自己身居要職嘅團體舉辦活動，仲因為佔領區議會而搞到被保安抬走，成功迫使建制派重新審議有關撥款。事件發生後，聽聞一班中西區建制派議員為免瓜田李下，今屆區議會開展後曾私下商議盡量避免擔任地區組織顧問，以免泛民議員有把柄借機攻擊。
強調唔係硬性規定
為咗同地區保持良好關係及緊密接觸，唔少區議員都會擔任地區組織顧問，但一唔小心就好容易招人口實，尤其係審批撥款時，無申報清楚，隨時被人話私相授受。其實好多人都心知肚明，做地區組織顧問只係掛個名銜，獲組織邀請做主禮嘉賓。但自從經過峯鴿玩轉區議會一役後，唔少建制派議員都成為驚弓之鳥，紛紛退出地區組織，實行明哲保身。
中西區區議會主席葉永成透露，今屆區議會開始時，曾鼓勵議員退出地區組織，盡量唔好掛上同鄉會、居民協會等組織頭銜。佢又話每次開財務委員會時，議員都要申報清楚所有利益關係，而一啲地區工程都盡量由政府部門負責，以免被人指同非牟利團體私相授受，因為一經渲染，公眾嘅印象就會好差。有建制派議員承認，佢哋私底下的確曾討論過退出地區組織，全因擔心一旦漏報會好麻煩，但強調唔係硬性規定。
當年有份被指同政改撥款有利益衝突嘅中西區區議員陳捷貴話，擔任地區組織嘅名譽顧問，有時只係希望邀請相關區議員主禮時少啲托手（月爭），掛名同唔掛名嘅分別唔大。但佢透露最近已退出咗兩至三個組織，減少被泛民議員攻擊嘅機會，強調會繼續支持地區組織。其實避嫌係好事，唔知其他區議會會唔會倣效呢？
