清明拜山燒鑊甘 泉下有知也難安

呢，雖然下禮拜至係清明節，近日已經有唔少孝子賢孫提前上山掃墓。尋日之嘛，有市民喺柴灣華人永遠墳場燒衣紙拜祭後，疑未有處理好火種，蔓延至山草起火冒出濃煙，好彩有途人及時發現報警求助，消防足足花咗一粒鐘至救熄，總算係不幸中之大幸。否則咯喎，分分鐘引致火燒山大災難都似。

講起都閉翳，每逢春秋二祭，烈火燒山幾乎係指定動作。遠嘅唔講，去年清明節短短一日之內，居然發生超過一百五十宗山火，都咪話唔誇張。其中流浮山一宗三級火，更波及一間汽車回收場，一度直逼民居甚至軍營添，連解放軍都不敢怠慢，出動逾百官兵滅火，認真大陣仗。

話時話，山火有幾可怕，三歲細路仔都知啦，造成財物損失仲係事小，最怕危害到周邊民居及行山人士嘅安危，當年八仙嶺山火釀成重大死傷，相信大家記憶猶新嗱啩。事實上，大部分山火都係人為疏忽所致，絕對係人禍而非天災。

星星之火，可以燎原，雖則人所共知，始終知易行難。其實政府同傳媒每年都苦口婆心向外界宣揚小心山火嘅訊息，而市民只需遵守一啲簡單嘅守則，例如清除雜草，以及喺化寶盆燃燒香燭冥鏹，離開時確保火種已熄滅，已經可以令山頭免於火劫。可惜吖，言者諄諄，聽者藐藐，近年山火依然燒得旺盛，可見港人成日企喺道德高地譏笑內地人公民意識薄弱，其實只不過係五十步笑百步o架咋。

唔係危言聳聽o架，正如堪輿學家話齋，火焚三年終於完結，猴年火氣雖然減弱，但流年仍然屬火，「火猴」活躍難捉摸，加上金木交戰之局，唔止政局動盪多變，仲要特別注意火種，慎防祝融之災。寧可信其有，不可信其無，小心駛得萬年船呀喂。

古人話，慎終追遠，民德歸厚矣。畢竟祭祀先人，重在心意，正如有環保團體提倡以鮮花代替冥鏹，亦未嘗唔係一個好方法，總好過一個唔小心留下火種，搞到「清明墓園燒鑊甘，孝順反而變害人」，如果列祖列宗泉下有知，都唔會安樂喇，係咪？