城中鏡：智能勢代
人工智能程式AlphaGo早前以四比一局數戰勝韓國圍棋高手李世乭，成為一時熱話。「熨斗大王」東保集團主席Charles陳鑑光話人工智能應用廣泛，尤其係用喺家電產品方面，已係大勢所趨。生產力促進局主席Stanley劉展灝亦話，相信未來唔少工種無可避免會被人工智能取代。但電訊數碼執行董事張敬山就擔心，若持續發展落去，人工智能一旦超越人類指令，或者會為人類帶嚟威脅。
劉展灝話人工智能將取代愈嚟愈多人力。
陳鑑光話科技應用範圍好廣泛。
張敬山（左）話科技對人類嘅影響日益明顯。旁為太太鄧鳳賢。
莊氏姊妹：難取代創意工作
Stanley話依家好多勞動嘅工作無人肯做，好似佢間錶廠好多工序已經自動化。近年醉心學揸飛機嘅Charles就話人工智能除咗應用喺飛行之外，家電方面亦係大趨勢，但發明同普及係兩回事，現時普及嘅科技產品，好多都係幾十年前已經發明咗。
咪話人工智能，唔少人冇咗部電腦或手機，生活都已經有好大問題。張敬山就話成日搞唔掂啲電腦，要靠科技部同事幫手，試過公司電腦出問題，成個人企喺度冇晒符。
張敬山仲擔心將來唔知係人類主宰科技，抑或係科技主宰人類，亦都擔心科技會為人類帶嚟威脅喎。
同場仲有中華總商會常務會董楊華勇與太太莊菲娜及其妹莊莎娜。楊華勇認為人工智能超越人類好合理，仲話科技係用嚟幫人類解決問題。經營珠寶生意嘅莊氏姊妹就認為，人工智能難以取代珠寶設計等有創意嘅工作，好似鑑定鑽石顏色、淨度等標準，都仍然係靠人判斷嘅。
