東網電視
更多新聞短片富貴黨被視為建制派「壞孩子」，向來唔撐特首CY梁振英，該黨主席兼紡織及製衣界議員鍾國斌尋日出席一個論壇時，再次表明如果CY用依家咁嘅施政方法嘅話，係唔會支持佢連任，其後又忽然搗亂，隨處點火頭，高調鼓勵現年四十二歲、生肖屬虎嘅立法會議員兼建仔主席李慧琼參選，莫非有人為求反CY，真係可以不顧一切，即使要擺其他人上枱都在所不惜？
其實富貴黨同CY唔咬弦，喺政圈係公開嘅秘密，鍾國斌自接任黨主席後，亦繼續走呢條路線，最強火力係喺舊年八月，曾稱同前兩任特首比較，CY係至今表現最差嘅一位，而尋日出席一個電台論壇時，鍾國斌除咗一貫唔撐CY連任，更首度鼓勵早前辭任行政會議成員嘅李慧琼參選特首。
撐「臥虎」出選 盼誕女特首
仲記得李慧琼嘅黨友葉國謙，曾經話過黨內臥虎藏龍，有好多符合出任特首條件嘅人選，鍾國斌喺論壇上以此借題發揮，話李慧琼本身屬虎，「臥虎喺我隔籬」，表明鼓勵對方參選特首，又盼望有女特首上場，改善香港情況。
其後鍾國斌進一步解釋，話本港跨黨派都支持發展政黨政治，加上女性領袖亦係世界大趨勢，所以李慧琼參選對社會係好事，可以多個選擇。但佢之後都戴番個頭盔，當問及如果李慧琼真係參選，富貴黨會唔會投票畀佢時，佢就話要視乎對方嘅政綱，同能否團結建制派等。
鍾國斌忽然喺特首選舉呢個敏感議題，擺李慧琼上枱，而且同李慧琼早前公開表明明年唔會參選特首嘅立場一百八十度相反，自然得唔到當事人嘅認同，李慧琼當場嘅即時反應亦好出奇，直言「嘩，搵我過橋」，又強調無論係咪支持CY或其他參選人，都唔應該以性別作重點考慮，反而應該考慮該人能唔能夠團結建制派、點樣處理深層次矛盾、市民支持度、中央信任度同其團隊人選等。
話時話，富貴黨為咗同CY唱反調，真係無底線，唔知下次又會借邊個過橋搗亂，達到佢哋路人皆見嘅目的呢？
第一手消息請下載on.cc東網
