政壇：鄧家彪划艇不復當年勇
老實講，香港可以玩水上活動嘅地方唔多，嚟嚟去去都係得沙田城門河。尋日就有團體邀請立法會議員馬逢國同Bill鄧家彪到啟德避風塘試玩龍舟同划艇。阿Bill曾經係中文大學划艇會代表隊，早前佢仲自爆勤練健身，操弗自己，但現場所見，佢喺水上面划艇熱身時姿勢十足，但係一上岸玩划艇機時，一分鐘先划得二百九十米，連當年入隊一分鐘划三百米嘅最低要求都達唔到，明顯不復當年勇喇！
鄧家彪玩划艇機，狀態不復當年勇。
馬逢國（前右）同觀塘區議員蘇麗珍（前左）齊齊划龍舟。（互聯網圖片）
尋日阿Bill特登着件中大划艇會嘅T恤現身，明顯係想趁機威吓。佢話讀書嗰時，經常喺城門河訓練，啲水係黑色，水質好差，相比之下，啟德嘅水質好靚。佢又話事前曾向大會打探過，使唔使同人鬥快划艇，對方答佢只係普通試吓水做示範啫，所以佢先至鬆懈，無盡全力練習喎。不過，講真嗰句，雖然阿Bill划艇成績的確無當年咁勁，但係同其餘三名選手比，都贏咗幾十米嘅。
落場划龍舟嘅馬逢國就話近年議會拉布令佢周身骨痛，仲有埋肩周炎，今次落水划幾下，膊頭即刻鬆番啲喎。
