早前學民思潮宣布停止運作，前召集人黃之鋒承認日後會同部分成員組成政黨。被指將會代表政黨出戰立法會九龍東直選嘅學民前發言人Oscar黎汶洛近日就頻頻現身，唔單止成日出席公開場合，更加積極寫網誌，關注唔同議題。尋日就趁復活節假期，促政府盡快將「勞工假」同「銀行假」睇齊。不過，有人就質疑仍然係學生嘅Oscar連工都未返過，就學人爭取假期？

斥檢討3年得個吉

Oscar話現時正係復活節，但唔係人人有假放。跟住佢就好似上通識堂咁，細數香港將假期分為「銀行假」同「勞工假」嘅典故，仲話「銀行假」一年有十七日，但係「勞工假」只得十二日，即係白領同勞動階層有唔同嘅假期，而復活節假期，正正就係唔包括喺「勞工假」之中。Oscar質疑政府三年前話要檢討，但係依家仍然得個吉。

見Oscar講得頭頭是道，但佢仍然係學生，連正式全職工作都未有，最多只係做過實習，以佢嘅身份同勞工階層爭取假期，係咪唔多夠說服力呢？

疑博九東勞工選票

有人就話，Oscar咁做係為咗選戰，目標係九龍東嘅勞工選票。咁講亦都不無道理，事關Oscar唔止一次提過勞工議題，好似農曆新年時，佢就同前學民成員周庭去狙擊工聯會理事長吳秋北同會長林淑儀，質疑工聯會喺全民退休保障問題上「走數」。

Oscar雖然被林淑儀鬧佢無家教，但仍然為佢喺網上博得唔少掌聲。Oscar今次再次針對勞工議題，唔知係唔係食髓知味呢？

第一手消息請下載on.cc東網iPhone/iPad/Android/Windows Phone Apps