立法會拉布早就唔係新聞，但拉布嘅代價究竟有幾大，你又知唔知呢？

嗱，淨係講今年財委會審議財政預算案嘅撥款申請咋，議員一共提交七千三百六十條問題，打破歷年紀錄，簡直可以列入健力士世界紀錄大全。其中以社福界議員張國柱最誇張，以八百四十八條問題稱王；屈居第二嘅張超雄亦有七百七十六條問題，可以講係半斤八両。

即係咁，提問題係議員嘅職責，有建設性嘅問題當然唔嫌多，弊在部分政客往往為反對而反對，為提問而提問，其中唔少係重複又重複，毫無實際意義，咁就累事喇。

唔講唔知，處理一條問題嘅成本唔少o架，財經事務及庫務局局長陳家強兩年前曾經講過，由於議員問題太多，當局要安排八十名員工日夜處理，平均每條問題嘅成本高達四千八百元。再計埋兩年來嘅通脹，依家一條問題嘅成本最少要五千一百元，即係話今年七千三百六十條問題，隨時要花費三千七百五十萬元公帑。如果量化計算，呢七千幾條問題可以換到二百二十四萬罐午餐肉同一百七十四萬罐豆豉鯪魚，都咪話唔誇張。

不可不知，呢啲問題只係針對財政預算案嘅撥款申請，今時今日拉布流會成為家常便飯，如果計埋其他議題所浪費嘅時間及公帑，可能係天文數字都似。有議員曾經計過數，以立法會一年行政開支六億六千四百萬元計算，一日嘅使費係二百五十五萬元，仲未包括秘書處及議員加班等額外開支，換句話講，拉布一日最少浪費二百幾萬元，咁多年來都唔知燒咗幾多公帑，你話納稅人係咪冤哉枉也。

當然喇，相對於工程及民生議題因為受阻於拉布而造成嘅損失，呢啲可能仲係小兒科咋。好似港珠澳大橋咁吖，當初因為政治阻力及司法覆核等原因而延遲動工，搞到超支五十幾億元；其他大型基建亦唔好得幾多，幾乎無一不延誤，無一不超支。所以話，反對派政治掛帥，「港人治港」淪為「拉布治港」，全港七百萬人都成為受害者，政客根本係損人不利己。

始終都係呢句，政治爭拗唔可以當飯食。拉布玩殘港府事小，拖死香港事大，近年香港競爭力已經跌跌不休，邊緣化危機迫在眉睫，政客繼續不務正業，添煩添亂，香港只有沉淪到底嘅咋，叮！