城中鏡：朱潔儀睇傑作想開畫展
今年嘅三月雖因氣溫低，暫未見春暖花開，但藝術氣氛依然好濃厚，唔少城中名人都相繼觀摩藝術展。有「港姐畫家」之稱嘅前港姐朱潔儀，前日亦都率先欣賞藝術展，佢本人向來鍾意繪畫好美麗嘅事物，呢日可以見到咁多大師級作品，表現得更加興奮，最重要嘅係，呢個展覽激勵咗佢，令佢心思思都想開一次畫展，睇怕佢遲吓會更瞓身自己個畫室嘞。
巨型蜘蛛藝術品太神似，朱潔儀作狀快步而過。（互聯網圖片）
朱潔儀日前去咗參觀一個藝術展，欣賞大師作品。（互聯網圖片）
朱潔儀呢日一身輕裝去睇藝術展，見到一個超巨型蜘蛛嘅作品時，佢難免驚恐，但又忍唔住面帶笑容，都唔知佢係太欣賞蜘蛛作品做得神似，定係睇到大師作品而忍唔住笑，睇完之後，佢仲喺社交網站留言：「見到好多國際大師的作品，嘆為觀止。令我都心郁郁想開畫展添！」
