城中鏡：會董托平貨
每年喺維園舉行嘅工展會尋日首度移師澳門，一連三日喺澳門漁人碼頭會議展覽中心舉行。主辦單位香港中華廠商聯合會（廠商會）一班會董拉大隊去撐場。過往會董們出席呢啲場合，通常只係買幾包嘢食當支持，點知今次有幾位會董唔止畀面咁簡單，睇啱平靚正嘅冷氣機，竟然買咗搬返香港，仲大嗌好抵買，認真搞笑。
徐晉暉（左起）、李世傑同梁啟洲買冷氣機返港。（受訪者提供）
羅程剛（左起）、會董吳國安同僑豐行行政總裁黃偉鴻齊去撐場。
李秀恒稱澳門工展會若效果理想，有機會再辦。
工展會第一次進軍澳門，唔少參展商都抱小試牛刀心態，有人仲講明唔期望賺好多，只想畀多啲人認識香港品牌。但廠商會副會長徐晉暉、常董李世傑同會董梁啟洲就好識貨，三人行行吓被發現一人抬住一大個箱，咪以為佢哋係幫手做「咕喱」，其實係咁啱見到平貨即掃返屋企。徐晉暉話，佢哋手上嘅係直立式冷氣機，兼可抽濕，啱晒依家嘅天氣。李世傑就話，家傭房間冷氣剛好壞咗，部機價錢約一千元，佢見合理即時買咗，但附近冇車所以抬住走。
銷售額料達億元
同場仲有會長李秀恒，副會長戴澤良同史立德、常董楊華勇、廠商會金融服務業主席羅程剛等。羅程剛話，好耐冇去澳門玩，所以今次同楊華勇提早一晚過嚟。李秀恒就話，今次係首次喺澳門辦工展會，澳門政府過往較着重推廣旅遊同飲食，因此對今次工展會相當重視，若效果理想，唔排除明年再辦。戴澤良就話首日原以為會落雨，好在天公作美，下午人流漸多，預計銷售額可達一億港元。
