政壇：長毛大壽 黨友送「輸」倒米
立法會議員梁國雄（長毛）聽日就六十歲，登六之後，長毛都就快變白毛，社民連黨友同老友們都隆重其事，用咗逾一年時間，靜靜雞籌備一本屬於長毛嘅書賀佢六十大壽，佢哋揀定尋日放喺酒箱，當靚酒咁送畀長毛。
梁國雄（左）獲黨友黃浩銘（右）同曾健成（中）送上生日驚喜。
呢本新書名為《我反抗故我在》，內容記錄咗長毛二十幾年來同法院打過嘅官司，仲邀得立法會主席曾鈺成、前立法局主席黃宏發等人講吓佢哋眼中嘅長毛。長毛收禮應該好開心，但佢笑言，生日其實係「母難日」，唔應該幫自己慶祝，仲話依家呢個時勢唔應該做壽，完全政治不正確喎！唔通長毛嫌大家送「書」畀佢？話晒今年係選舉年，「輸輸」聲，對有心政途嘅人真係唔多吉利喎。
