政壇：衝擊立會判社服 李國章呻量刑輕
香港大學校務委員會主席李國章同港大校長馬斐森，前晚同港大各學院「頂尖學生」晚膳，有份出席飯局嘅學生向港大學生會刊物《學苑》披露會面內容，指李國章喺會上批評，早前衝擊立法會人士被判幾十小時社會服務令，判刑過輕。至於回歸五十年後嘅香港前途問題，李國章認為《基本法》喺二○四七年後會繼續運作，只要港人唔惹怒中國，中國就唔會干預香港，佢仲形容旺角暴亂事件係「kick the tiger（捋虎鬚）」。
李國章指衝擊立法會人士獲判社服令太輕。 （資料圖片）
《學苑》引述李國章於會上指，以佢嘅資歷嚟講，冇人比佢更適合做校委會主席一職，強調唔可以因為係邊個委任佢而批評佢，而應憑佢做出嘅成績畀評價。佢又反建議同學舉出一個比佢更適合做校委會主席嘅人選喎！
李國章仲不點名話，大學某啲教師會花時間喺政治上，如果利用公餘做呢啲嘢冇問題，但如果喺星期一嘅工作時間期間召開記者會，咁就好唔恰當嘞，仲話咁做嘅學院唔會取得好嘅世界大學排名咁話。
