復活節假期開始，機場尋日人頭湧湧，航班升降頻密，難怪機管局好着緊要興建第三條跑道。不過，天文台前台長林超英（黑英）尋日卻表示唔贊成建三跑，指當局低估咗喺海上興建一條跑道嘅難度，佢反建議港府善用港珠澳大橋，考慮購入澳門機場，咁樣，香港就擁有雙機場，好過起三跑喇。只不過，呢個似「晒冷」嘅構思好大諗頭，試問澳門唔肯賣點呢？將來航權談判又點呢？

黑英尋日出席一個電台節目時話，政府低估咗興建三跑嘅海上風險，仲列舉大量填海工程會縮窄航道、未來深圳增加蛇口等船量都可能帶來影響，為免將來三跑工程變成另一高鐵黑洞，必須及早煞停，依家港珠澳大橋興建緊，政府應善用呢個基建設施，考慮買入澳門機場。個建議聽落好新穎，但可行性就真係唔高。

事關澳門島上只有一個機場，唯一嘅機場同時係佢哋嘅交通命脈同戰略發展基建，肯唔肯賣畀香港呢？就算黑英建議係買起部分控股權，增加兩個機場嘅協同效應，但使費幾多呢？唔知。如果只係平過機管局興建三跑嘅一千四百億元少少，咁買機場不如起跑道；再退一步講，港珠澳大橋起好後，香港到澳門都仲要半個鐘頭，啲乘客會唔會拖住行李，上上落落驗證兩次先可以過澳門機場搭飛機呢？到時買咗機場又冇人用仲衰，黑英今次算唔算點條黑路畀香港呢？

第一手消息請下載on.cc東網iPhone/iPad/Android/Windows Phone Apps